Lopinn af kindinni okkar

Rok, vindur og innblástur

2011-01-12T13:36:00.000-08:00

Svo ég sé hreinskilin - þá hef ég hamast síðustu vikurnar, seint að sofa o.s.frv... kannski kannast einhver við það? Bara get ekki með nokkru móti skilið óvild þessarar klukku og hún er svo sannarlega ekki besti vinur minn á morgnanna, það þýðir lítið að skæla yfir því.
En úti er rokið og ég sit og fæ innblástur, það er ógrynni af myndum, litum, formum, tónar, andstæður, menningarheimar, flötur mætir fleti, sundurgreining, samsetning, orð, hugsanir, fortíðarþrá, rómantík, einfaldleiki og klassík. Það er ævintýralega gaman að fá hugmyndir.

Heil ný vefsíða er í mótun - það tekur líka tíma. Hugmyndafræði hennar er að vera söluvettvangur fyrir handverksfólk sem vinnur með þráð, en skilyrðið er eigin hönnun og gott handbragð. En eins og ég sagði þá er hún en í mótun og verður vel kynnt þegar að því kemur. Læt ykkur pottþétt vita.

En svo maður hafi nú eitthvað gaman af þessu þá set ég nú inn nokkrar myndir

Uppskrift af þessari er tilsölu.

Uppskrift af þessum skokk er til sölu.

þessi skokkur er til sölu sjálfur, kostar 4500,-. Hann er fyrir pínupons stúlkur, svona c.a. 2-4 mán.

þessi skokkur er til sölu á 4500,- og er á 6-12 mán

og uppskrift af þessari peysu til sölu, 2ja, 4ra og 6 ára.

og þessi líka fyrir 8, 10 og 12 ára.

já.. sko þessa er hægt að panta, stærð 74 og kostar 4500,-

jæja- nóg komið af þessu sölurugli ..
bestu og gleðilegustu prjónakveðjur
Vilborg

Húfutetur

2010-11-14T07:34:00.000-08:00

Skotthúfa, skotthúfa. Þessi skotthúfa sambland af húfunum Skottu og Snældu sem eru í bókinni Fleiri prjónaperlur. Græna húfan er í fullorðinsstærð - enda nokkuð stór á stúlkuna á myndinni. Ég á uppskriftina af henni tiltæka og hún kostar heilar 250kr. Húfan sjálf tilbúin með skúf og skúfskrauti kostar 4800,- (f. utan sendingarkostnað).
P.s. það er pínu seinlegt að prjóna perluprjón ;)

prjónakveðjur
Vilborg

Allt tekur sinn tíma ..

2010-11-10T13:26:00.000-08:00

Tími minn hefur horfið - í margt mjög skemmtilegt og gagnlegt. Ekki tími til að blogga - þannig er það bara.
En myndir segja meira en mörg orð - ekki satt ?

kær kveðja
Vilborg prjónaperla :)

Peysan mín - Hrafnaklukka

2010-06-16T14:29:00.000-07:00

Sumir gúggla sjálfa sig - ég gúggla stöku sinnum peysurnar mínar. Hef oftar en einu sinni rekist á þræði með peysunni Hrafnaklukku, umræðuvefi þar sem prjónakonur eru að reyna á átta sig á peysunni.

Gott mál en stundum vilja sumir leggja þann skilning í að uppskrifin sé gölluð... hálsmálið of vítt og peysan of stór m.v. munsturbekk og kannski fleira, átta mig ekki alltaf á hvað við er átt.

Skiptir ekki öllu - en en en Hrafnaklukka er óhefðbundin og sennilega sést það alls ekki nógu vel í myndinni í bókinni Prjónaperlur. Hrafnaklukkan mín á að vera víð, svona næstum því útvíð - bæði ermar og bolur, hátt stroff, ekkert aukið út eftir stroff. Síðan þegar kemur að munsturbekknum er lykkjunum fækkað með því að rykkja saman lykkjunum, munsturbekkurinn á að passa á barnið en svo er hann líka stuttur og hálsmálið er vítt. Hálsmálið er sannarlega vítt og einstaka sinnum hef ég rekist á að prjónakonur séu að fjölga úrtökum þar. Gott og vel getur flokkast undir tilbrigði - en ekki galli í uppskrifinni því ég set teygjutvinna í hálsmálið - til að draga það saman og til að það sé auðvelt að komast úr og í peysuna því í hún er prjónuð úr einföldum og einbandi saman og stundum er affellingin ekki nógu sterk til að þola börn sem eru að drífa sig úr og í - ef þið skiljið hvað ég á við.

Ok - ég talaði áðan um að bolurinn væri víður svo og ermar, svona útvíð en allt gert í þeim tilgangi... ... punkturinn yfir i-ið - þræða teygjutvinna í faldinn á bol og ermum og búa til "púff -peysu".

Svo þið sjáið - alls ekki hefðbundin í sniðinu -eða hvað ?? (það er það sem er svo gaman! )

jæja - efri myndin sýnir upprunalegu Hrafnaklukku, prjónuð á pínulitla skottu, seinni peysan er prjónuð á listakonuna Heklu - hún er aðeins stærri skotta eða svona 10 ára. Þessa peysu prjónaði ég á tvöfaldan plötulopa á prjónastærð 6, prjónaði laust, fitjaði upp á 100 lykkjur á bol og 36 lykkjur á ermi !!! en eins og ég sagði áðan, prjónaði laust og hún varð svo hrikalega mjúk og hlý, með púffermum en síð eins og kjóll því í þetta sinn sleppti ég að setja teygjutvinna neðan í bolinn.

Vinsamlegast hlaupið út í prjónfrelsið - hættið að líta á uppskrifir sem heilagar eða grandskoða hvort það séu ekki örugglega villur. Skítt með það hvort það eru villur eða ekki - bara frelsist og njótið ! það er svoooo gaman (... ... og kannski sennilega að öllum líkindum orðin fíkn hjá mér ;) )

bestu prjónakveðjur
Vilborg prjónaperla

p.s. það er vissulega uppskrift af Hrafnaklukku hér á blogginu mínu - en hún er sko fyrsta tilraunin mín til að búa til uppskrift og er örugglega með villur en þær Erla og Halldóra þaullásu uppskrifirnar í Prjónaperlubókina og ég sat sveitt margoft að lesa útúr, yfirfara og tryggja eins og best verður á kosið.

Nauðsynleg hjálpargögn

2010-05-25T17:13:00.000-07:00

Eitt af því sem mér finnst algjörlega nauðsynlegt varðandi mína prjónamaníu.. (hóst hóst) er að hafa góða geymslur, hirlsur undir verkefnin ... sem eru víst á hinum ýmsu stigum.
Ég er á þeim stað í prjónaþroskanum að ég get ekki með nokkru móti farið eftir uppskrift lengur - alltaf að finna upp hjólið. Í framhaldinu er ég búin að komast að því að ég þarf næði til að prjóna því það brakar og brestur í heilabúinu, reiknivélin er ekki langt undan og alls konar mælibönd og útreikningar. Hins vegar á ég fáein börn og þó þau séu ósköp miklir ljúflingar, þá prjóna ég ekki mikið á meðan þau eru vakandi.
Þess vegna er alveg bráðnauðsynlegt að geta lagt þetta frá sér, án þess að allt ruglist og til þess hef náð mér í nokkra litfagra gjafapoka. Þeir eru alveg ágætir, því þeir leggjast ekki að óþarfa saman (eins og plastpokar), kosta margfalt minna en töskur og síðast en ekki síst - þegar verkefni er lokið þá er þeim snyrtilega brotið saman og settir inn í skáp þar sem næstum ekkert fer fyrir þeim.

En að lokum - þegar maður er að finna upp hjólið - þá er ekki verra að skrifa niður, allar upplýsingar og meira en minna. Treystið mér - það hefur alltaf borgað sig ;)

Bestu prjónakveðjur
Lykkdís :)

Grjótmerkilegt alveg !

2010-04-20T15:12:00.000-07:00

Var síðast að velta fyrir mér þessum stöku vettlingum og sokkum - sem virðast þvælast fyrir manni allsstaðar.

OK ! nú hef ég ákveðið - að prjóna ekki samstæð pör þetta árið. Ég er sem sagt komin í " samstæðra - bindindi ".

Og ég hef hafist handa (sem sagt fyrstu sokkar og vettlingar sem ég prjóna þetta árið) og ég verð að viðurkenna það að það var hægara sagt en gert að prjóna ekki eins sokk ! þið ættuð bara að prófa og það væri gaman að heyra
- hvernig tilfinning er það að prjóna ekki seinni sokkinn eða vettlinginn ???

En svona að öðru - ég er ekkert að gefast upp á síðunni minni - neinei, ekkert þanniglagað. Ég hef verið sveitt að prjóna - tvær stórar lopapeysur og aðra þeirra úr léttlopa á prjóna 3.5. Ég veit ekki hvað ég var að hugsa - hún var í þokkabót með rennilás, í ofanálag fyrir danska kellu sem ég hef bara hitt tvisvar og þar að auki prjónaði ég aðra á kallinn hennar. Ég verð bara að segja - að maður hefur lítinn tíma til að gera eitthvað skemmtilegt þegar maður er í svona verkefni !!!

En það eru næg skemmtileg verkefni á næstunni - svona prjónaperluverkefni ;) ef þið skiljið hvað ég á við :)

bestu prjónakveðjur til ykkar allra
prjónakonan vilborg Lykkdís Stakssokksdóttir !

Stundum í stökustu vandræðum ...

2010-03-21T18:06:00.000-07:00

Hvað er málið með staka sokka og vettlinga. Maður hamast og hamast við að prjóna og það er allt að því lögmál að annar týnist. Oft finnast vettlingar í traktornum, á fóðurganginum, í óskilamunum í leikskólanum og á fleiri stöðum. En jafnoft finnast þeir ekki ... og hvað gerir maður þá við heilan haug af stökum vettlingum og svo líka - stökum sokkum ?

Hvers vegna þurfum við að ganga í samstæðum sokkum og vettlingum ? Hvað í veröldinni segir okkur að það þurfi að vera eins ? Svari mér sá sem veit, því ekki veit ég. Sumum finnst bara allt í fína að ganga í sitt hvorum sokknum, eins og ekkert sé sjálfsagðra. (hóst hóst - ég er víst alltaf í samstæðum sokk og vettl ... )

Ég velti núna fyrir mér, hvort það væri ekki gaman ... að prjóna í einhvern tíma bara staka sokka og vettlinga ? Það gæti verið gaman að vera með sitt hvort munstrið en sömu litina, eða sama munstrið og ekki eins liti þ.e.a.s. ef maður þorir ekki alveg að stíga skrefið til fulls.

Nú spyr ég - er einhver til í smá verkefni, átak ... ... að brjótast aðeins úr viðjum vanans og prjóna staka sokka og vettlinga og hafa svolítið gaman af þessu ? ( og stofna Facebook hóp til að sýna afraksturinn ;) )

ég held amk að ég prjóni bara staka sokka og vettlinga - alveg þangað til ég fæ leið á því ;)

Bestu prjónakveðjur
Vilborg

þetta gengur ekki

2010-03-16T16:54:00.000-07:00

Það gengur ekki að halda úti síðu - og láta hana bara damla.
En enga á ég mynd og það hefur stoppað mig af undanfarið. Það vantar ekki að maður er prjónandi ... er bara ekki að prjóna neitt nýtt eða skemmtilegt í augnablikinu. hef meira að segja varla tíma til að blogga eða taka myndir eða gera eitthvað skemmtilegt. Þessi prjónaverkefni sem ég er með á prjónunum... úff (bara svona venjulegar lopapeysur :) )

En - er með hausinn fullan af hugmyndum (misgóðum reyndar... ).

Góðir hlutir gerast hægt, hefur áður birst.

kveðjur í bili
prjónandi prjónakonan

Í kaupstað

2010-02-24T16:01:00.000-08:00

Fer stundum í kaupstaðinn, sem ég skilgreini sem Selfoss frá mínum bæjardyrum. Fyrir utan búð eina hefur staðið gína og ég verð að vanda mig við aksturinn því hún (gínan) vill gleypa athygli mína. Er þetta kjóll ? eða kragi ? eða sjal eða ??
Þegar ég var nokkrum sinnum búin að keyra framhjá (reyndar ekki í einni og sömu bæjarferðinni) þá varð ég einfaldlega að stoppa og athuga málið betur.
Og inn í búðina stökk ég og grandskoðaði fyrirbærið.

Þetta var hún Rauðhetta ! Fallega rauð, vélprjónuð, sniðin og saumuð saman.
Vel gert hjá þér Alda ! Skoðið á Facebook fleiri myndir af hönnun hennar. Klassískt og einfalt - með sjarma.

með bestu prjónakveðju
Lykkdís ;)

Verslunarmaðurinn

2010-02-16T05:41:00.000-08:00

Þessi mynd er af honum langafa mínum, á bakvið búðarborðið í versluninni sinni. Verslunin er svotil óbreytt, orðin gamaldags en stendur samt fyrir sínu og á sinn trygga kúnnahóp.
Margar sögur hef ég heyrt af þessum langafa mínum - en skondnast finnst þér þó það sem hann sagði við menn þegar þeir voru að máta jakkafötin - ef þau voru helst til þröng, þá spurði hann ,,finnst þér þau nokkuð vera of víð ?" og síðan ef þau voru of stór, þá spurði hann að sama skapi um hið gagnstæða og brosti í kampinn.

Verslunin stendur enn við Laugaveg, í fallegu háu húsi. Á efri hæðum kennir ýmisa grasa og fróðlegt fyrir langafabarn að kynnast þar arfleið sinni. Það er kannski ekki furða þótt ég hneigist í þessa áttina.

Og síðan gáta í lokin: hvaða búð er um að ræða ? :)

Með harðsperrur í maganum ..

2010-02-04T16:49:00.000-08:00

Síðastliðið sumar gerði ég þjóðlegt vesti á stúlku. Núna er í vinnslu vesti á drengi. Þetta tekur sinn tíma, reiknivél, exel, lykkjuteljari, blíantur, strokleður, pappír og reglustrika koma ekki síður að máli heldur en prjónarnir og lopinn.
Við skulum vona að ég klári þetta áður en ég verð gráhærð ... ...

bestu prjónakveðjur og takk kærlega fyrir mig á Gömlu Borg !
Vilborg prjónakona

Prjónakaffi á Gömlu Borg

2010-01-31T14:09:00.001-08:00

Núna á þriðjudaginn, 2.febrúar verður Prjónakaffi á Gömlu Borg í Grímsnesi. Gamla Borg er ákaflega fallegt hús og vel við haldið af smekkvísi.
Á þriðjudagskvöldum þeim sem verða fyrst í hverjum mánuði safnast þar saman prjónafólk og á notalega stund. Skiptist á gagnlegum upplýsingum, stöku uppskriftum og fær sér góðan kaffisopa.

Við sjáumst vonandi :)
Bestu prjónakveðjur
Vilborg prjónakona.

Sætustu skórnir !

2010-01-26T09:40:00.001-08:00

Vefsíðan með uppskrift

Uppskrift

Þetta eru án efa sætustu skór sem hægt er að prjóna á lítil kríli... það er svo alltaf hins vegar spurning um hvernig þeir tolla... ...

Þessar uppskriftir fann ég á vefrápinu mínu og hef reyndar oft prjónað þessa með bandinu yfir ristina, var smá tíma að finna út hvaða garn ég vildi nota en endaði með einfaldan plötulopa enda mikil lopakerling.

bestu prjónakveðjur
vilborg eða kannski Lykkdís Þráðrún Sokksdóttir ;)

Kanntu ekki að prjóna ?

2010-01-11T16:14:00.000-08:00

hvað gerir maður ef manni langar í lopapeysu - en kann ekki að prjóna ?

Tutural:
1. Taktu eina peysu sem þú tímir í smá tilraunastarfsemi
2. Taktu síðan fram saumavélina, ef þú átt ekki saumavél, þræddu þá nál og tvinna
3. Saumaðu súper einfalt munstur í peysuna, eða flókið ef þú ert í ham
4. Gaktu frá spottum og endum
5. Sko þig !!

bestu kveðjur
Vilborg prjóna-saumakona

Bangsakarl

2010-01-07T09:53:00.000-08:00

Ef ég kemst ekki í að prjóna það - þá amk teikna ég það. Betra en ekkert - ekki satt ?

Líður tíminn kona !

2010-01-02T15:02:00.000-08:00

Janúar merkir dyr.
Nýtt ár og það allt fullt af óopnuðum pökkum. Í sumum veit maður innihaldið en aðrir geyma leyndarmál þar til þeim er upplokið.
Ég var í dag að raða flokka og skoða innihald allra myndaalbúmanna í tölvunni - með sérstöku tilliti til prjónsins. Var nokkuð ánægð með þróunina og vona svo sannarlega að hún haldi áfram - maður er nefnilega aldrei yfir gagnrýni hafinn.
Þetta ár er svo sannarlega búið að vera stórskemmtilegt en það er líka svo ótalmargt sem ég hlakka til að gera á þessu nýja sem er gengið innfyrir túnfótinn. Það sem er efst á tilhlökkunarlistanum er að klára Febrúar - peysuna góðu og svo að sjálfsögðu Woolfest sem verður haldið í Norræna húsinu í lok júní. Ég hef reyndar af því miklar áhyggjur að þurfa að hafna áhugaverðum atriðum í Woolfestinu því Landsmót hestamanna verður haldið á sama tíma. Ég er og verð alltaf meiri hestamaður heldur en prjónakona ef að því kemur að velja - það er nú bara þannig ;) Draumurinn er að eiga meri á Landsmóti ...

Ég þakka kærlega fyrir öll innlitin og einnig þátttökuna í Jólakúl 2009, það var verulega skemmtilegt !
Mínar allra bestu prjónajóla og prjónanýárskveðjur
Vilborg prjónakona

Hráar og einfaldar - koma þær frá hálendisbrúninni

2009-12-16T17:13:00.000-08:00

Í góðviðrinu berst reykjarlykt að vitunum, hangiketið að fá á sig rétta mynd. Það er ekki furða þótt sveinar nokkrir rumski af dvala við indælan ilm af ketinu og bjúgnaspottunum. Kotið er við hálendisbrúnina, fjallasýnin gleður á hverjum degi og endalaust getur maður teigað náttúruna í sig.
Það er stutt í að hestar verði teknir á járn og því fylgir tilhlökkun að takast á við eitthvert spennandi tryppið.

Skjáturnar eru í braski í fjárhúsinu með eflaust fínum hrúti sem kom frá næsta bæ.

bestu kveðjur

Ennþá gerast góðir hlutir hægt

2009-12-03T13:56:00.000-08:00

Kæru prjónakonur og menn!
Mig langar til að hvetja ykkur til að prjóna jólakúlur í öllum stærðum, gerðum og litum. Er það ekki einmitt upplagt jólastemmningar-verkefni fyrir prjónara á þessum árstíma....!? Setja ljúfa jólatóna á og upplifa aðventustemmninguna beint í æð og prjóna.

Í síðustu færslu er hægt að nálgast grunnuppskrift að prjónaðri jólakúlu, sem hægt er að útfæra eins og hvern lystir; prjóna í hana liti eða munstur eða hvað sem er. Jólakúluna er hægt að prjóna með hvaða bandi sem er - veljið bara prjóna sem henta bandinu sem notað er- það eru engin skilyrði. Jólakúlan er fyllt með tróði áður en henni er lokað - svo hún verður mjúk og yndislega búttuð.

Sendið mér svo myndir af jólakúlunni ykkar og ég mun smella henni hér inn og á síðu Jólakúl hópsins á Facebook - sem þið megið líka endilega gerast meðlimir í og líka bjóða vinum ykkar að vera með í.

Jólakúl er sett af stað í þeim tilgangi að hvetja prjónafólk til sköpunar og til þess að búa til sín eigin skemmtilegheit. Tilgangurinn er að búa til sameiginlegt verkefni. Allir sem taka þátt eru að vinna að einhverju sameiginlegu, útkoman verður margbreytileg, skemmtileg, vekur til umhugsunar, skapar stemmningu og stuðlar að samkennd.
Lokatakmarkið er að gleðjast yfir eigin framtaki og sköpun því hver kúla verður einstök í sinni mynd.
Uppskriftin er einungis beinagrind sem hver og einn þarf að útfæra samkvæmt eigin hugmyndum. Nú er boltanum kastað áfram til þín og þú kastar áfram.

Prjónum og gleðjumst!

Stemmning

2009-11-20T12:24:00.000-08:00

Jólakúl er stemmning. Sækið uppskriftina hingað - og síðan prjónið, gleðjist og komist kannski í jólastuð :)
jóla - prjónakveðjur
Lykkdís Þráðrún Sokksdóttir :) (geysilega var þetta fyndið ! )

Góðir hlutir gerast hægt

2009-11-08T17:10:00.000-08:00

Góðir hlutir gerast hægt - það er mottóið mitt þessa dagana. Tímastress er algjörlega hallærislegt - maður græðir ekkert á því. En samt ekkert dól, leti er löstur sem ætti að læsa niðrá hafsbotni.
Verkefnalistinn er langur og næsta víst er að hann lengist á næstu vikum... hmmm ... ...

En jólakúlurnar og börnin. Spurning hvort maður sé nógu klikkaður að prjóna fullt af jólakúlum og fylla á jólatréð ? hvernig væri það? Bæti því á verkefnalistann.

Enn þetta með heklið - ætlaði svosum ekki að fikta mikið í því, er nefnilega að reyna að setja á mig einhverjar hömlur, en svo fór sem fór - brustu stíflur og brýr. Hef ekki hugsað um annað undanfarið, hekla litlar dúllur og setja á peysur í staðin fyrir munsturbekk, setja út um allt á peysuna, eða ekki, setja langsum rendur eða þversum. Hugsanlega er ég með gott ímyndunarafl því í huganum er ég búin að þessu öllusaman, sé þetta allt ljóslifandi fyrir mér - kristaltærar myndir. En það eina sem ég hef haft tíma til - er að setja eina heklaða dúllu á jólakúlu... ... hún er bara þá sönnun þess sem ég er að hugsa - hún er einfaldlega byrjunin á svo miklu miklu meira - góðir hlutir gerast hægt og hér kemur Blóðberg:

og svo bestu prjónakveðjur
Vilborg

Koma svo ! Jólakúl 2009

2009-10-18T18:36:00.000-07:00

Alltaf jafn uppátækjasöm.
Stofnaði Jólakúl - hóp á Smettskinnu !
Til að hvetja allar jólaglaðar prjónakonur til að taka þátt í smá jólaskreytinga sprelli. Eingöngu til að hafa gaman af.
Veit að það er enn langt til jóla - en trúið mér - stundum er ágætt að vera ekki alveg á síðasta snúningi í desember - þá á allt að vera svo kósí og rólegt ... (ja - right !!! )

En það eina sem ég óska - er samt ekki heilagt - að myndirnar séu teknar með hvítum bakgrunn, t.d. með því að nota lak eða hvít blöð. Þetta er ákaflega einfalt og þessar myndir eru teknar með þannig bakgrunn og græjaðar örlítið til í hinu einfalda og ókeypis forriti Picasa.

Bestu kveðjur og koma svo! allir að taka þátt :)

Prjónakveðjur
Vilborg

Prjónapæl

2009-10-11T17:05:00.000-07:00

Það er ekkert gaman að bloggi sem er ekki uppfært - ekki satt ?? En eftir miðnætti á sunnudagskveldi - gef ég mér smá tíma.
Ég sit kannski ekki auðum höndum - gæti það yfirhöfuð ekki. En margt þarf að gera, sérstaklega þegar maður á 5 börn (hóst hóst ... ...) hund og kött, hrossin tuttugu og eitthvað og skjáturnar 4 - 29.

Búin að vera að prjóna tösku - er komin í alveg svakaleg vandræði því hún er svona B verkefni (fær því að sitja á hakanum ef það er annað meira spennandi) en það hefur því miður leitt það af sér að hún er alveg að verða úrelt - og líka þreytandi. Ég veit ekkert hvernig ég á að lenda þessu máli. Eini kosturinn við hana er garðaprjónið !

En svo er ég að prjóna peysu á hana dóttur mína. Spennandi verkefni. Læt hér fylgja glefsur :)

góðar prjónakveðjur

p.s. og svo ætla ég að prjóna jólakúlur ... ... því ég á handóðan son ... ... ;)

p.s.s.
Hér er Þjórsá og brúnn moldarbakkinn með grænum þúfum í baksýn

húfur húfur húfum húfna

2009-09-20T18:02:00.000-07:00

Húfur eru eitthvað sem tiltölulega fljótlegt er að gera og nauðsynlegt að bera.
Hér má sjá tvær sem ég prjónaði í sumar.
Einfalt og fljótlegt - as usual ;) gott í gjafir

prjónakveðjur
Vilborg

Skyssuskjátan

2009-09-18T15:14:00.000-07:00

Þar sem mér nægir ekki að elta þær, fóðra þær, éta þær og prjóna þær - þá teikna ég þær.
Á u.þ.b. 20 myndir af þeim - málaðar og teiknaðar og eiga það allar sameiginlegt að vera kómískar. Kindur eru ekki bara kindur - sumar þeirra hafa eru bara fyndnar eins og hún Svarta Skikkja og náttúrulega hún Halla. Þeim finnst brauðið gott og kjömsuðu með lygnum augum ef maður bar slíkt með sér út til þeirra. Sömuleiðis urðu þær svekktar og gáfu skít í mann ef maður gleymdi sér, lögðu kollhúfur og fnussuðu.

Á bæ einum sem ég þekki til - bönkuðu heimaskvísurnar uppá og þáðu afgangs kartöflur eftir hádegismatinn.

já - þær eru skemmtilegar skjáturnar :)
kveðja
Vilborg

Skaftholtsréttir

2009-09-17T04:22:00.000-07:00

Það var svo sannarlega blautt í réttum þetta árið - það þurfti næstum því kút og kork eins og ein sagði. Þó svo að það hafi rignt hressilega þá var múgur og margmenni í réttum og allir glaðir í bragði.

Kastljós fór í réttirnar og náði þessum stórskemmtilegu myndum - kíkið á :)

p.s. ég þekki ekki þessa tvo sem voru að tala í símann ... ... ;)

EF ég væri á fjalli

2009-09-08T03:31:00.000-07:00

Ef ég væri á fjalli núna, væri ég að ríða úr Norðurleit og niður á Fit með fleiri Austurleitarmönnum. Í dag væri ég ekki að smala - því það er ekki stingandi strá á Öræfunum, ekkert nema grjót og klappir. Við Helgavatn er áð og nestið maulað. Ef við erum heppin verðum við á undan Aðalsteini fjallkóngi og þeim leitarmönnum sem er að koma inn á Fit. Á morgun yrði ég - líkt og í gær - alein í leit, ein með hrossum og hundum að smala kindunum niðrúr. Stöku sinnum mundi ég sjá aðra fjallmenn í fjarska.
en senn líður að réttum
bestu smalakveðjur
Vilborg

Hann Steini Sterki

2009-08-30T15:43:00.000-07:00

Senn líður að fjallferðum. Í kvöld er maðurinn minn að járna fjallhestana fyrir Steina í Haukholtum, vanda þarf til því ekki má maður alltaf vera að þvi að járna í miðri smalamennsku.
Fjallferðir, leitir eða göngur er alveg sérstakt fyrirbrigði - sérstök upplifun eða lífsreynsla og algjörlega ómissandi fyrir þá sem vilja telja sig bændur - eða menn með mönnum í því samfélagi. Engann hef ég hitt sem finnst leiðinlegt að fara á fjall þó það sé á köflum svínslega erfitt, veðrið með óleik og besti hesturinn orðinn haltur.

Þegar ég var innan við tvítugt starfaði ég við tamningar í sumarvinnu og einn vetur. Fannst mér þessi vinna sérstaklega skemmtileg og var oft það lengi í vinnunni að ég hafði ekki orku í að skemmta mér eins og aðrir unglinar - eða gerði minna af því. Bóndinn sem ég vann hjá þessi sumur var farinn að hafa áhyggjur af mér - áhyggjur af því að ég mundi pipra. Því lagði hann fast að mér að ,,sækja um leit" eins og það er kallað þegar maður óskar eftir því að fá að fara á fjall. Svo fór að ég sótti um leit hjá hreppstjóranum. Í dag gorta þeir sig báðir af því að hafa komið mér út því í þessari fjallferð kynntist ég manninum mínum og á í dag með honum börn og bú, þar með talið nokkrar skjátur.

En aftur að Steina. Hann er sauðfjárbóndi í húð og hár og getur masað um rolluheimana endalaust, fram og tilbaka. Núna í vikunni leggur hann af stað ásamt hópi af fólki til að koma fénu til byggða. En hann Steini er nefnilega líka rúningsmaður - og fer hann á milli bæja og rúir fleiri hundruð fjár. Þess vegna má leiða líkur að því að það sé rúningurinn hans Steina sem renni á milli fingranna þinna þegar þú ert að prjóna.
Hann Steini er einstaklega glaðlyndur og hláturmildur, það kæmi mér ekkert á óvart þótt gleðistraumar fylgdu með :) .

Bestu prjónakveðjur
Vilborg

Ein ein-föld

2009-08-24T18:16:00.000-07:00

Það byrjar víst allt með stroffi ... ... nei - reyndar ekki alveg allt, en þessi peysa gerði það amk. Hún er svo einföld að allir þeir sem hafa pínu litla reynslu af peysuprjóni ættu að rúlla henni upp. Uppskriftina á ég til og öllum velkomið að fá - uppskrift :)
Þessi peysa er prjónuð úr einföldum plötulopa og einbandi (saman) stærðin á að vera á 2 ára og er á hún að vera svona peysuskokkur. En síddin er alltaf svosum útfærluatriði - eins og með annað.
kveðjur
Vilborg prjónakona

Lobba á litla snúllu

2009-08-19T09:54:00.000-07:00

Lopapeysa á 1 árs systurdóttur mína. Léttlopi og óhefðbundið munstur :)
senn líður að fjallferðum og réttum ...
- en lopakveðjur frá prjónakonunni

Vestið og húfan

2009-08-12T04:57:00.000-07:00

Vestið mitt og húfan er vísun í þjóðlegar hefðir með efnisval og útlit en er einnig tilraun til að hvetja til frekari útbreiðslu á notkun á þjóðlegum flíkum.
Vestið og húfan eru prjónuð úr léttlopa og ef ég hefði haft meiri tíma - þá hefði ég sent inn nokkrar útfærslur af þessari hugmynd, bæði fyrir stráka og stelpur.
En börnin mín hafa forgang og þangað til - þá bíður prjónið eftir afgangsstundunum ...

bestu kveðjur
Vilborg prjónakona

Handverkshátíð á Hrafnagili

2009-08-11T17:39:00.001-07:00

Jæja
Er ekki kominn tími til skrifta ??
Tíminn flýgur frá mér eins og svo oft áður - en nú er kominn tími til að setja myndir af því sem ég sendi inn í samkeppnina Þráður fortíðar til framtíðar og það er svo gaman frá því að segja að ein hugmyndin mín tókst á loft og fékk tilnefningu til verðlaunanna í hönnunarsamkeppninni.

Það var því ærin ástæða til að sækja Handverkshátíðina heim, börnunum pakkað niður í blikkbeljurnar og ekki dugðu minna en 3 bílar. Nei, nei... ekki allir fullir af mínum börnum en í þriðja bílnum var ljósmyndarinn, Hans mágur og dætur.

Í bakaleiðinni var stoppað á Heimilisiðnaðarsafninu og veitti það ekki síður innblástur heldur en Hátíðin á Hrafnagili. Ég hvet alla sem leið eiga um Blönduós að stoppa á þessu einkar glæsilega safni því þar er svo sannarlega margt sem gleður augað.

Bestu kveðjur
Prjónakonan Vilborg

Kjóllinn sem liggur uppí skáp

2009-07-17T04:58:00.000-07:00

Ég bloggaði fyrr í vetur um kjól sem ég hyggðist prjóna - sem ég gerði og og og gerði mistök á. Eða réttara sagt - prjónaði hann eins og ég hélt að hann kæmi vel út en hann gerði það bara ekki ... ...
(Reyndar skoðaði ég Raben Saloner um daginn - og svei mér þá - ekki svo ólíkt amk hvað víddina varðar :))

Ég geri endalaust mistök og ég furða mig oft á því hvað ég get verið seinheppin í saumaskapnum og prjóninu, sumir væru búnir að gefast upp hugsa ég líka með mér. En það er samt ennþá þrá í að halda áfram og telja sér trú um að það hafi nú verið gott að gera þessi mistök - geri þau amk ekki aftur :)

Sennilegast liggur þetta í því að ég get ekki fylgt uppskriftum og ég hef mjög ákveðna skoðun á því hvernig flíkin á að líta út á endanum.

Jæja - ef einhver hefur áhuga á þessum kjól - eða einhverju sem myndi kallast uppskrift, þá hef ég hér einhverskonar beinagrind ;)

venlig hilsen
Vilborg prjónakona

Ein besta peysan sem ég hef átt

2009-07-15T11:51:00.000-07:00

Þessa peysu fékk ég í afmælisgjöf sumarið 2006, í ágúst og notaði hana frá fyrsta degi þó mjög væri heitt í veðri. Ég hreinlega elskaði þessa peysu og geri enn. Merkilegt að maður skuli hafa tilfinningar til slíkra hluta en svo varð.
Núna í dag er hún orðin gatslitin en ég fer samt alltaf í hana, kannski ekki á hverjum degi svona yfir heitustu mánuðina en fast að því.
Hún er prjónuð úr léttlopa, er nokkuð þétt og eins og sniðin á mig. Munstrið er munstrað uppúr barnapeysu-uppskrift sem við eigum einhversstaðar.

Litli Hjálpari

2009-06-30T17:19:00.001-07:00

Þetta litla apparat er alveg bráðnauðsynlegt fyrir prjónakonur eins og mig. Ég mundi víst teljast vera eitthvað sem kallast ,,sveimhugi", sífellt að hugsa um eitthvað nýtt, þess vegna er svona gott að vera með hjálpara sem telur fyrir mann. Síðan á ég nokkur börn sem taka lítið tillit til einbeitingar við prjónaskap. Ég þarf því hundrað sinnum og meira en það að standa upp og gera eitthvað bráðnauðsynlegt. Síðast en ekki síst - þá segir mér þessi litli hjálpari að ég kemst eitthvað áleiðis - sérstaklega þegar prjóna þarf fjölmargar umferðir. Ég mæli með þessari aðstoð :)

Annars er búið að vera brjál að gera. Fjórða barnið orðið 2ja mánaða, síkátur drengurinn - eða alveg næstum því. Gestagangur er þónokkur enda sumarið komið. Síðasta helgi var allt að því súrrealísk. Ég hef eiginlega ekki tölu á þeim fjölda barna sem voru hér - inn og út að leika, gist var í hverju herbergi og óendanlega skemmtilegt. Það komu fleiri gestir og ég svitnaði við tilhugsunina um að ég ætti eftir að klára mitt viðfangsefni sem ég vildi senda í samkeppna ,,Þráður fortíðar til framtíðar". Bara til að hafa gaman af og leyfa einhverjum af mínum hugmyndum að komast á koppinn ef maður má segja svo.

En kæru Prjóniprjón konur. Ég þakka kærlega fyrir mig, ákaflega skemmtilegt að taka þátt :) :)

bestu kveðjur
Prjónakonan Vilborg

Krummapeysan

2009-06-11T08:57:00.001-07:00

Þessi peysa er orðin nokkurra ára gömul og er prjónuð með krummana tvo í huga - Hundinn Krumma og Krummann sem stríðir honum ! Munstrin af hundinum og hrafninum koma frá Ístex.

12 prjónakonur

2009-06-10T16:53:00.000-07:00

Fæ stundum margar prjónahugmyndir. Veit eiginlega ekki hvað ég á að gera við þær allar því þó ég sé stundum allt að því ofvirk þá kem þeim náttúrulega ekki í verk... í prjón. Hvernig væri að vera með 12 prjónakonur í vinnu ... ... ?

Peysa á Hrafnkel Flóka

2009-05-26T15:06:00.001-07:00

þessi peysa kallast minnir mig "5 hour Baby Boy sweater" og er prjónuð ofanfrá og niður. Þar sem ég rann alveg blint í sjóinn hvers konar garn var notað þá ákvað ég að prjóna úr tvöföldu Kambgarni svona miðað við uppgefna prjónastærð og svona. Svo finnst mér litirnir í kambarninu bara svo skemmtilegir og það er mjúkt og þjált að prjóna úr. Mér fannst mjög gaman að prjóna þessa peysu - var reyndar svo áköf að ég gleymdi hnappagötunum (ég bý bara til hneslur). Nú þarf ég bara að leggja höfuðið aðeins í bleyti og útfæra hana í stærri stærðir - maður verður einfaldlega að redda sér ef maður kemst ekki á námskeið hjá Ragnheiði í Prjóniprjón :)
venlig hilsen
vilborg prjónakona

Peysa á Magnús Arngrím

2009-05-26T15:04:00.000-07:00

Þessi peysa er prjónuð úr Smart garni, vísvitandi laust, svo hún yrði fljólegri - auðvitað. Hún er líka vísvitandi höfð fremur þröng því satt best að segja þá er ég orðin smá þreytt á hólkvíðum og stuttum barnapeysum. hugmyndin að vösunum tókst ekki alveg eins og ég heði kosið, viðurkenni það alveg - ég veit allavegana hvernig ég vil hafa þá næst ... hahaha.

Óþarfi að finna upp hjólið

2009-05-26T14:47:00.000-07:00

Það er mín skoðun að það sé óþarfi að finna upp hjólið, amk þegar kemur að þeim hluta þar sem ég hef fundið það upp. Það er reyndar alltaf kannski smá flókið að skilgreina og túlka hver hefur fundið upp hvað. Allavegana - ef það er eitthvað hér á síðunni sem mætti teljast þér til gagns eða gamans, lesandi góður, ekki hika við að senda mér tölvpóst á vilmaria@ismennt.is eða brakverabrynja@hotmail.com.

ég hvet ykkur til að skoða þennan link á Handverkshátiðina á Hrafnagili kannski lumar einhver á einhverju spennandi.

Bestu kveðjur
prjónakonan

Og skokkur

2009-04-30T13:48:00.000-07:00

lítil lopapeysa

2009-04-30T13:44:00.000-07:00

Nýjir skór, úr gömlu þýsku blaði

2009-04-27T13:18:00.000-07:00

Búin að vera að þráast við - en kláraði þá loksins í dag. Ég er nefnilega búin að setja sjálfa mig í straff - má ekki byrja á neinum nýjum hlut fyrr en allt það hálfkláraða er búið... ...

Ein doldið góð mynd eftir Sigurlinn

2009-04-19T16:31:00.001-07:00

Hér er tunglið mjög þreytt, jú sjáiði til - það fær aldrei að sofa - það er alltaf einhversstaðar nótt !!

Kuðlukanína

2009-04-19T16:29:00.000-07:00

Lion Brand® Recycled Cotton
GAUGE:
Exact gauge is not essential to this project.
STITCH EXPLANATION:
sc2tog (sc dec) Insert hook into st and draw up a loop. Insert hook into next st and draw up a loop. Yarn over, draw through all loops on hook.
hdc2tog (hdc dec) Yarn over, insert hook into st and draw up a loop. Yarn over, insert hook into next st and draw up a loop. Yarn over and draw through all loops on hook.
NOTES:
Blanket is worked with 2 strands of yarn held tog throughout.

BLANKET
With 2 strands of yarn held tog, ch 2.
Head
Note: Head is worked in continuous rnds; do not join or turn.
Rnd 1: Work 6 sc in 2nd ch from hook; place a marker to indicate beg of rnd; move marker up as each rnd is completed.
Rnd 2: 2 sc in each sc around – 12 sc.
Rnd 3: *2 sc in next sc, sc in next sc; rep from * around – 18 sc.
Rnd 4: *2 sc in next sc, sc in next 2 sc; rep from * around – 24 sc.
Rnd 5: *2 sc in next sc, sc in next 3 sc; rep from * around – 30 sc.
Rnds 6–11: Sc in each sc around.
Rnd 12: *Sc2tog, sc in next 3 sts, rep from * around – 24 sts.
Rnd 13: *Sc2tog, sc in next 2 sts, rep from * around – 18 sts.
Rnd 14: *Sc2tog, sc in next st, rep from * around – 12 sts.
Do not fasten off.
Blanket
Note: Work now proceeds in rows; turn at beg of each row.
Row 1: Ch 2, turn, 2 hdc next 6 sts; leave rem sts unworked – 12 sts.
Row 2: Ch 2, turn, 2 hdc in first st, hdc in each st across to last st, 2 hdc in last st – 14 sts.
Rows 3–12: Rep Row 2 – 34 sts
Row 13: Ch 10, turn, hdc in 3rd ch from hook, hdc in each ch and st across – 42 sts.
Row 14: Ch 10, turn, hdc in 3rd ch from hook and next 7 ch, hdc in next 34 sts; leave rem sts unworked – 42 sts.
Row 15: Ch 2, turn, hdc2tog, hdc in next 30 sts, hdc2tog; leave rem sts unworked – 32 sts.
Row 16: Ch 2, turn, hdc2tog, hdc in each st across to last 2 sts, hdc2tog – 30 sts.
Rows 17–29: Rep Row 16 – 4 sts.
Row 30: Ch 2, turn, (hdc2tog) twice – 2 sts.
Fasten off.
EARS (make 2)
With 2 strands of yarn held tog, ch 2.
Rnd 1: Work 4 sc in 2nd ch from hook; place a marker to indicate beg of rnd; move marker up as each rnd is completed.
Rnd 2: *2 sc in next sc, sc in next sc; rep from * around – 6 sc.
Rnd 3: *2 sc in next sc, sc in next 2 sc; rep from * around – 8 sc.
Rnd 4: *2 sc in next sc, sc in next 3 sc; rep from * around – 10 sc.
Rnds 5–10: Sc in each sc around.
Rnd 11: (Sc2tog) 5 times – 5 sts.
Fasten off.
FINISHING
Stuff head and sew closed. Sew Ears to top of head.
Edging
With right side facing and 2 strands of yarn held tog, join yarn with sl st in edge of blanket below head, work sc evenly spaced around blanket edges to opposite side below head, working 2 sc in each corner.
Tie hands in knots. With brown yarn and following diagram, embroider straight st eyes, nose and mouth.
Weave in ends.

ABBREVIATIONS / REFERENCES
Click for explanation and illustration
beg = begin(s)(ning)
ch(s) = chain(s)

hdc = half double crochet
rem = remain(s)(ing)

rep = repeat(s)(ing)
rnd(s) = round(s)

sc = single crochet
sl st = slip stitch

st(s) = stitch(es)
tog = together

Ein svo einföld

2009-04-19T16:24:00.000-07:00

Þessi kemur frá Lion Brand - svo einföld, því hún er prjónuð frá annarri erminni út á hina, kunnugleg aðferð frá barnapeysu.
Ef einhverjum langar í uppskriftina - þá hef ég hana vistaða í tölvunni, kann því miður ekki að setja inn link ... ... og nýjan glugga. Held að uppskriftin taki svo mikið pláss - en það er kannski bara allt í lagi ??

Ég steiki sjálfa mig ...

2009-04-15T16:23:00.000-07:00

Held í alvörunni að ég sé að gera sjálfa mig brjálaða ... Sífellt og endalaust slæ mín eigin persónulegu met í því að byrja á verkefnum - sem ég svo klára ... ... sumhver ekki og önnur seint. Ég fæ u.þ.b. 150 hugmyndir á dag, allflestar stoppa stutt og þá aðallega vegna þess að ég sannfæri sjálfa mig um að ekki sé tími.
En svo eru það þessar sem ég er svo uppfull af að geta klárað bara nákvæmlega strax á eftir en síðast en ekki síst - eru það bestu hugmyndirnar sem velkjast um í kollinum svo vikum eða mánuðum skiptir.
Og ég veit að þegar litla krílið mitt er komið í heiminn - þá get ég alveg gleymt því að hafa nokkurn tíma til að gera nokkurn skapaðann hlut ... ... veit það alveg og er löngu búin að átta mig á því -
Því ég hef engu mikilvægara hlutverki að gegna en að vera móðir.

Fleiri myndir af nýju peysunni

2009-03-22T15:58:00.000-07:00

,,það er sko kalt hérna - getum við ekki farið bara inn ??"

,,haa ?? á hvað á ég að horfa ... ??"

,,doldið fyndið að vera svona fyrirsæta"

,,það á enginn svona peysu nema ég"

Ný peysa

2009-03-22T15:51:00.000-07:00

þessi er splunkuný - hún er í ,,púff-stílnum". Ég er alveg að verða búin að skrifa niður uppskriftina :) Það er eins gott - svona áður en maður gleymir ... ...

Barna bomsur

2009-03-10T14:29:00.000-07:00

Þessar dásamlegu bomsur fann ég á Ravelry og var alveg búin að ákveða að kaupa uppskriftina - nema hvað - síðan sú virðist vera eitthvað týnd...
En úr því svo er - getur maður ekki gert þetta sjálfur ???
hvernig væri það ???
En hvernig ??? :)
( síðan: http://www.ravelry.com/patterns/library/fat-baby-booties )

Hefðbundar lopapeysur

2009-02-28T12:55:00.000-08:00

Það er í sjálfu sér ekki leiðinlegt að prjóna hefðbundar lopapeysur - en peysa á fullorðinn karlmann getur tekið smá tíma og þegar önnur hefðbundin lopapeysa bíður, og önnur og hin fjórða ... þá ... verð ég smá löt.
Ég ætti að hafa það fyrir reglu að prjóna eitthvað nýtt á milli lopapeysna - væri það ekki gáfulegt ?
Ja, maður spyr sig!?
venlig hilsen
Vilborg

Og allt það sem ég ætla að gera ... ...

2009-02-13T13:28:00.001-08:00

Hvernig væri eiginlega ef ég myndi setja ,,upskriftirnar" með myndunum ?? Væri það gagnlegt ?:) ætli það ekki.
Það er þá bara spurning um tíma - er það ekki.
En ekki núna - nú er mins bara lasinn og krílið í bumbunni sparkar og sparkar.
Næst á dagskrá er að klára amk 3 hefðbundnar lopapeysur ... það er víst þannig orðið að fólk hefur einhverja tröllatrú á að ég sé orðin hraðvirk með prjónana - og ekki vantar huginn - annars mundi ég segja nei - hahaahaa.
Þetta er bara gaman - eins og alltaf
Bestu kveðjur úr sveitinni

Hefðbundin hyrna

2009-02-08T13:56:00.001-08:00

Þessi hyrna er svo hefðbundin og auðveld í framkvæmd.
En annars - þið sem skoðið síðuna mína - megið gjarnan kommentera - það væri svo gaman. Og líka - ef ykkur vantar upplýsingar - ekki hika við að spyrja, það er algjör óþarfi að finna upp hjólið aftur.
Venlig hilsen
Vilborg

Skokkur á Ásrúnu og skokks-skór ...

2009-02-04T13:55:00.000-08:00

Tvær hugmyndir

2009-01-27T14:18:00.000-08:00

Hér eru tvær af nýjustu hugmyndunum. Peysuna ætla ég að athuga hvort Jenný gæti nokkuð prjónað - (ég fékk gjafabréf á 2 prjónaðar peysur í jólagjöf - mikil hamingja)
Kjólinn ... ... ég veit ekki hvað ég á að segja ... ... Sko - ég er eiginlega búin að prjóna hann - og hann mistókst að hluta. Hann er alltof stór á mig - þ.e. þegar maður er með kúlu þá virka ég eins og fjall í honum. En ég veit í hverju mistökin liggja og maður á alltaf að læra af mistökunum en ekki hvað.
Ég er samt ekki að nenna að prjóna hann aftur í bráð - ég er ennþá að reyna að hugsa hvernig mér getur samið við hann. Mér hefur dottið í hug að selja hann - en ég hef ekki hugmynd um hvernig maður fer að því ... ...
Það má líka vera að ég breyti honum, en þegar hann er til - þá lofa ég að setja inn mynd af honum.
En á meðan hann er í salti þá ætla ég að glíma við vélprjónaða efnið sem ég keypti á dögunum og ætla að athuga hvort hægt sé að prjóna við það ... ... það er ákaflega spennandi verkefni.
jæja - ég skil ykkur þá eftir í lausu lofti en þó ekki alveg, hvet ykkur til að skoða heimasíðu nálarinnar : www.nalin.is ( ef ég kynni nú að setja inn link þá væri ég búin að græja það ... það vill bara ekki virka hjá mér) hvet ykkur líka til að skoða http://www.rabenssaloner.com/ og http://prjona.net/
venlig hilsen

Nálin.is

2009-01-27T14:02:00.000-08:00

Fór í dag til Reykjavíkur, svosum ekki frásögu færandi nema fyrir þær sakir að ég fór í hina margrómuðu búð á Laugaveginum, Nálina.
Reglulega gaman að koma þangað, allir heimsins litir af garni, bækur, blöð, prjónar - eiginlega veit ég ekki hvað var ekki þarna.
Hvet allar áhugakonur um prjónaskap að líta þangað inn.
Ennfremur til að upplýsa ykkur - ágætu lesendur -þá er hægt að kaupa garn og uppskriftir frá Helgu Isager þ.e. maður verður að kaupa garnið og þá fylgir uppskriftin, garnið er mjög mjúkt bómullargarn
Ég var nú kannski með smá móral, spurði aumingja konuna spjörunum úr og keypti ekki neitt (ég er enn í þunglyndiskasti yfir kjólnum sem misheppnaðist ... ... )
En ég m.a. kastaði til hennar þeirri hugmynd að hægt væri að halda prjónavéla-kennslunámskeið í salnum í Brautarholti ef við fengjum næga þátttakendur.
Þetta kemur bara í ljós, en ég vona samt að það verði af því - fyrr en seinna - áður en ég unga út barninu sem verður vonandi ekki fyrr en í lok apríl.
Bið að heilsa í bili.

Lopapeysa á 1 árs gutta

2008-12-30T10:12:00.000-08:00

Loksins fær litli einræðisherran sérprjónaða lopapeysu. Hann þarf ekki lengur að sætta sig við notað, þvælt og þæfðar peysur sem hafa gengið barna á milli.
Þessi peysa er - að venju - með öðruvísi sniði þar sem garðaprjón er notað sem ,,litur" í munstrinu. Það kemur alveg ágætlega út og nóg gargaði piltur þegar ég hugðist taka hann úr peysunni, greinilegt að hann er verðandi smekkmaður.

Tími ?

2008-12-27T13:36:00.000-08:00

Tími til kominn að segja eitthvað, blogga og gera meira en ekki neitt. Myndirnar mínar koma til með að birtast á boggsíðu sem er einungis tileinkuð þeim. Þetta verður áfram fyrir lopann.
Ég er aldeilis ekki hætt að fá hugmyndir, ónei- það gengur bara svo hægt að koma þeim niður á blað og hvað þá hingað inn.

lesumst vonandi von bráðar.
hilsen prjónakonan.

Peysujakki

2008-04-26T18:40:00.001-07:00

Þessi er nýjasta afsprengi hugsana minna. Peysu-jakkinn á að vera prjónaður úr ... Létt-lopa - allra sennilegast að það hennti og prjónið skal vera garðaprjón. Ermarnar eiga að vera nokkuð sérstakar - ég veit ekki hvort það tókst að teikna það. Það er snúið að teikna þegar hendurnar láta ekki nákvæmlega af stjórn.

Peysa

2008-04-26T18:36:00.001-07:00

Þessi peysa er búin að vera lengi til í kollinum á mér. Kraginn er mjög sérstakur og heiðurinn af honum á Kínversk kona sem var eitt sinn með mér í hestaferðalagi á Landmannaafrétti. Hún sem sagt gaf mér peysu sem hún átti sem var með svona kraga. Það sem ég á eftir að afreka - er sem sagt að átta mig nákvæmlega á því hvernig hann er gerður. En hugmyndin er hennar og verður það áfram.

Ný snið ??

2008-03-22T15:50:00.001-07:00

já - sko loksins er ég búin að koma þessu hingað inn. Tók alltof langan tíma. En eins og sést þá er þetta einungis ennþá á teikniborðinu og í bókinni góðu (þar sem allt er rissað inn) eru margar fleiri myndir og krot.
Efast um að ég komist yfir að prjóna nokkuð af þessu... ... synd finnst mér. En svona er það nú víst. Þeir fiska sem róa.

með venlig hilsen
Vilborg

Ný einföld peysa

2008-03-22T15:28:00.001-07:00

Þessi var prjónuð í snarhasti, kláruð fyrir fermingarveislu. Þessi er úr einföldum, hún er með víðar ermar og bolurinn einnig víður. Síðan er rykkt saman áður en munstrið er prjónað. Ein tala til að hneppa saman.

Tímatölt

2008-03-03T02:40:00.001-08:00

Það er alveg hreint merkilegt hvað sumir hlutir, tiltölulega einfaldir, geta tekið langan tíma í framkvæmd.
Fyrir LÖNGU síðan ætlaði ég að setja hér inn órpjónuðu hugmyndirnar. Sumar hef ég reyndar rissað niður á blað. Það sem tefur mig er að mig vantar að teikna betur gínurnar, þ.e. vantar betri hlutfallateikningu af barni því ég hef ekki verið ánægð með þær skyssur sem ég hef gert, ekki rétt hlutföll og þess háttar. Svo að ég leggst útí heilmikla fyrirhöfn og vesen við að leita að henntugum myndum í Anatomy teiknibókum. Ég er meira að segja búin að tala við Katrínu Briem og biðja hana um að aðstoða mig við að verða mér úti um nokkrar hlutfallamyndir. Næsta skref er að fá upplýsingar hjá Hansa mág, hann á áhugaverða bók.
SVo er það að teikna góða gínu - sem ég get svo notað til að teikna nýjustu hugmyndirnar á, og teikna fleiri og fleiri hugmyndir og að síðustu - fara í smá slag við skannann og koma þeim hingað.
Svona er þetta yfirleitt með svo mikið af því sem ég geri - forvinnan getur tekið óendanlega (næstum) langan tíma. En svona gerast hlutirnir hjá mér víst :).
það eina sem ég get sagt - þetta kemur á næstunni.

Frænkurnar í sjóræningjaskipinu

2008-02-24T16:13:00.001-08:00

Hér er hluti af afurðum sumarsins.
Þegar maður er óléttur þá fær maður frí frá sumum útiverkunum en maður reynir nú að gera eitthvert annað gagn í staðinn, t.d. að breyta gömlu grunnskólahúsnæði í leikskóla, senda hóp af fólki inn á afrétt í þrautakóng á eftir bóndanum (fararstjóranum), sópa gólf, elta Íslandssól girðingafannt og síðast en ekki síst - prjóna doldið í leiðinni.
p.s. ég tók meira að segja upp prjónana á milli verkja ... ...

Hefðbundin lopapeysa

2008-02-24T16:09:00.000-08:00

Þessa peysu á daman mín. Hún vildi endilega fá bleikt og bleikt, en það kannski fer hennar háralit ekki alveg ,, ... ... geggjað leiðinlegt".
En litirnir eru bara alveg ágætir svona og hún er alveg sátt við þessa ;).
Á þessari peysu er ekkert stroff en einfalt hekl til að gera hana skemmtilegri.

Lopapeysa úr tvöföldum

2008-02-24T16:04:00.000-08:00

Þessi peysa er prjónuð úr tvöföldum plötulopa á prjóna 4 1/2. Munstrið er frá mörgum Ístex-peysum samansett, tekin úr samhengi og litum breytt. Vona að mér fyrirgefist það. Útfærslan á kraganum er eins og í nýjasta Ístex blaðinu nema að ég hafði klaufina ekki eins langt niður og að ég held - hafði kragann aðeins síðari.

Sá besti :)

2008-02-24T16:00:00.001-08:00

Þessi er alveg heitur úr verksmiðju Jennýar, jólagjöfin í ár. Þetta vil ég kalla lopakjól. Hann er prjónaður á einfaldan plötulopa á prjóna 3 1/2 og er því þéttari en hinar peysurnar. Hann er útvíður að neðan og um ermar, í hálsmálinu kemur rykking og svo kemur munsturbekkur (Ístex - vesti) í styttra lagi.
Ég er afskaplega ánægð með þennan.

Einföld peysa á litlar dömur

2008-02-24T15:55:00.000-08:00

Þessi peysa er búin að vera í miklu uppáhaldi. Einföld að búa til eins og flest sem ég geri ( því ég er ekki orðin fógu klár ennþá hahaah). Hún er lipur því hún er úr einföldum plötulopa. Svolítið víð að neðan og um ermar, stuttur munsturbekkur og vítt hálsmál.
Mjög fín yfir pils og gallabuxur.
Þið bara sendið mér tölvupóst ef þig viðjið einhverjar upplýsingar.

Peysa úr einföldum plötulopa

2008-02-24T15:50:00.003-08:00

Þessi peysa er mikið einföld en jafn þægileg. Hún átti aldrei að verða neitt annað en tilraunaverkefni og hún er óspart notuð í það eða sem sagt, hún er notuð í gegningar, í harðjaxla sportið og fleira hark sem eðlilegt getur talist hér í Skarði. Það er ekki ennþá komið gat og hún hefur verið í notkun síðan snemma í haust.
Þessi peysa er með lasaermum og víðu hálsmáli, reyndar varð það ekki eins vítt og ég ætlaði mér - en það kemur bara næst - ekki satt ???

Síð léttlopapeysa með V hálsmáli

2008-02-24T15:44:00.000-08:00

Þessa peysu fékk ég gefins í afmælisgjöf frá Jenný, eða réttara sagt, gjafabréf á peysu eftir mínu höfði. Ég á svo sannarlega magnaða tengdamömmu.
Síddin á peysunni er u.þ.b. á mið læri, lykkjum er fækkað svo það komi betra lag á hana, ermar eru hafðar beinar - svona eins og ég vil hafa þær og síðan var notast við uppskrift úr Ístex-blaði fyrir berustykkið og efst á ermunum - nema hvað við ákváðum að breyta því og hafa v-hálsmál.

Hlý og góð álfahúfa

2008-02-22T13:46:00.001-08:00

Þessi húfa er prjónuð úr léttlopa, síðan þæfð í þvottavél og að síðustu saumuð og hekluð blóm og litlar perlur til að skreyta. Þessi er mjög hlý og passar eyrun í öllum næðingnum sem hefur verið undanfarið. Nauðsynlegustu upplýsingar, lykkjufjölda umferðir og aðferð á ég niðurskrifað hjá mér. Ætla mér að birta þ.h. upplýsingar til gagns fyrir aðrar hér á síðunni - um leið og ég hef tíma hahahaha.

Einbandsskokkur með klukkuprjónsmunstri

2008-02-10T16:05:00.000-08:00

Ég verð að viðurkenna það - að þessi tók smá tíma. Fyrst þurfti ég að leita mér að munstrinu sem ég hafði einhverntíma séð. Svo var að átta sig á því hvernig í ósköpunum svonalagað var prjónað - en mins hafði aldrei prófað nokkuð þessu líkt.
Þar að auki ákvað mins að ráðast ekki á garðinn þar sem hann er lægstur og er skokkurinn prjónaður úr einföldum plötulopa.
Á öxlum er líka klukkuprjón og í hálsmálinu er rykking sem kemur mjög skemmtilega út.
Þeir sem hafa áhuga - þá á ég nokkrar gagnlegar upplýsingar, eitthvað sem kæmi næst því að heita uppskrift.

Og ein mynd af rauðhærðu skottunni

2008-02-10T15:06:00.000-08:00

Eldspræk dóttir mín í nýrri, hlýrri flík. Þessi skokkur, ( eða vesti ) var mjög auðveldur, eitthvað sem allir ættu að geta gert. Þó hann sé gerður úr einföldum plötulopa, þá er hann samt á færi allra sem annars kunna að prjóna smávegis. Maður þarf reyndar að vera spakur við þann einfalda, vera bara aðeins mjúkhenntari en áður og þá fær maður líka lipra og mjúka flík. Útkoman er líka ótrúlega misjöfn eftir því hvort maður prjónar á 3 1/2 eða 4 1/2 en þessi er prjónaður á stærri prjónana. Þessi flík er mikið notuð og ekki enn farin að gefa sig.

Fáeinar myndir

2008-01-30T15:55:00.000-08:00

Prjónaskapur og sköpunarþörf

2008-01-30T14:59:00.000-08:00

Það er óskaplega gaman að prjóna, búa til og sjá bandið verða að flík. Ég er ekki heimsins besta prjónakona og satt best að segja - þá er ég bara rétt að slíta barnsskónum í þeim efnum.
En men ó men... hvernig á maður að fara að þegar hugmyndirnar í kollinum eru að brjálast eftir útrásarþörf ?? þær eru svo margar að þær flækjast um hver aðra, detta stundum um koll og gleyma sér en aðrar eru athyglisjúkar og minna sífellt á sig. Svo get ég líka verið hvatvís með eindæmum, get vaðið í ýmis verk og gjörðir án þess að hafa vaðið fyrir neðan mig. Stundum verður það mér til happs ... og stundum ekki.

Svo oft hugsa ég um hvað það væri gagnlegt að geta átt sér hliðstæða veröld, veröld sem væri einfaldlega aukinn tími í allt það sem maður þarf að gera. En það eina sem virkar - held ég - er að vinna aðeins hraðar, skrifa niður allar mögulegt, skipuleggja tíma sinn vel og brosa í kampinn. En hvað ég elska að fá svona margar hugmyndir !